Hay hay hay hay hey!
Tywala wen’ ungumtshabalalisi!
Uyinzala kumdiliya,
Usisisele sengqolowa.
Uwahluthil’ amakamva,
Uwapoqil’ amaphupha.
Uwaqengqil’ amabhodlobhodlo nemibungwana.
Uyinyok’ enyel’ iziqithi zika bawo,
Ulinyal elanyeles’ izicithi zika bawo.
Nyhubhenhyubhe yesinyolokonjana.
Nyhek’ inenyhonyhothela yaseMamfengwini.
Nyhany’ inenyhonyhokonyhoko yase Mlungwini.
Zakuthiy’ iimbongi zath’ uyinyikinyiki ngokwenyam’ ebolileyo.
Ndithi ke mna mntu uyimboni uyi nyekenyeke ngokwe nyal’ elingundileyo.
Hay tywala wen’ungumtshabalalisi!
Ungu Hola wendlel’ enesitshingitshane.
Unguhala wendlel’ enamajingi- qhiwu.
Sigebenga ndini segongqong’ elinqumul’ imiqala.
Uliqwili legqwirh’ elafa lalibal’ ukubaxolela.
Ulichiza lexhwel’ wlibang ingcwaba.
Mdali wengxwabangxwaba namangcwaba.
Uyaluzelis’ utsheq’ ingqondo wena tywala.
Akulogqubusha nto nje uzel’ akadyakalash amaqhinga.
Oginye wena akavani nenyaniso, Owazana nawe akanay’ injongo abanye ukubacingela.
Ubatsho bayayatheke kukugxadazela.
Ubabetha banxanxatheke kukubhadazela.
Ubatsheq’ ingqondo ubagawula yonk’ intw’ ibisentloko.
Ubahlohl intshong OonoNyongo, ubadidiyela ubagalel’ umdintsintsi nethyeneba xa ubaphendla!
Usisahlulo kwizahlulo zobumnyama zesihogo.
Ndubul’ ebhodl’ isabhongo, intywabasi netywanasi.
Uhlobene kakhulu nomdiza, Zenzo zakho zivela tancu ngokweendiza.
Akulahlekis’ uyamfamekisa!
Ndith’ akuqalekis’ uyabhubhisa!
Bhodlom! Wolokohlo kweezongxondorha!
Wen’ imitheth’ akuyaphul’ uyayiqwabaza, ewe imizi akuyichithi uyayisasaza.
Ndithi imitshat’ akuyaphula uyayiqwabaza.
Isidima akusilahli uyasigibisela!
Yiyoke lonto ndithi ngolohlobo!
Ndengcingcilili! Nde Gram iYhooo!
Niyazthand’ indaba Mos!
