[optin-monster slug=”o1oltbelggnq0q5uohhx” followrules=”true”]
Bekulusuku olukhulu lokwenza umlando namhlanje, umhla wesithandathu kweyeSilimela kumaMpondo nanjengoko bekubanjwe umsitho wokukhumbula amadoda athi asweleka ebulawa ngexesha lembubhiso yentaba yase Ngquza. Esi sikhumbuzo bekungesamashumi amathandathu anesithathu sibanjwa kanye phezu kwentaba ye Ngquza. Ukanti ngamadoda alishumi elinanye athi aphulukana nobomi emva kokudutyulwa kwindibano eyayibanjwe malunga nokujamelana nemithetho eyayinyanzelisa ukucuthwa kobunini bomhlaba. Amadoda angamashumi amahlanu anesibhozo onzakala kanobom kule mbhubhiso. Ishumi elinesithathu apho lagwetywa ze laxhonywa.
Lo msitho ubuphethwe liphondo le Mpuma Kapa, ukwazinyaswe ngamalungu epalamente nalapho ziwe ngokuwa iintetho kusenziwa izibhambathiso ngokona kunokwenzeka ukuxolisa ezoo ntsapho kwanokuphuhlisa isizwe samaMpondo. Usekela mphathiswa wesebe lezolimo, uhlenga-hlengiso lwemihlaba kunye nophuhliso lwamaphandle, u Nkskz.Zoleka Capa udize ukuba imali engama- 24 ezigidi zeerandi ibekelwe bucala ukuphuhlisa, watsho ekhweba abasemagunyeni ukuba basondele.
“Kusemdleni kuthi ukuphuhlisa esi sizwe sinembali etyebe kangaka kodwa esisahlwempuzekileyo, kwaye simema abasemagunyeni nakurhulumento ukuba basondele kushukuxwe umba wokuphuhliswa kwesi sizwe” Kutsho u Capa.
Ukanti zikho iinkqubo esele ziqalisile nekuxoxwa ngazo. Kodwa kukwaphawulwe nokuba ukungaboni ngaso nye phakathi kwabahlali kunye norhulumente ngemiba ethile kuzinyathelisa ngesantya solovane iinkqubo zophuhliso.
“Sikwamemelela kwikomkhulu ukuba lenze okufanelekileyo, ziphele iimbambano ukuze kuqhutywe iinkqubo zophuhliso” kumemelela u Nkskz. Capa.
Ukanti iintsapho zamaxhoba ale mbubhiso zithi akuxolisi konke ukubona esi sizwe siphila phantsi kwale meko ngokungathi ooyise bawela ilize. Obethetha egameni leentsapho, U Nkskz.Nokulunga Mfuywa uhlabe ikhwelo ukuba urhulumente aqwalasele ukusondeza amaziko aza kuxonxa izakhono zolutsha lwesizwe samaMpondo nazo zonke ezinye izizwe ezisongqongileyo.
“Abantu abatsha apha abanamisebenzi kodwa nguwo lo umhlaba udinga ukusetyenziswa ukuze kwakhiwe iindawo zokuxonxa izakhono zolutsha, kuphele indlala”.
Ukwathe nanjengoko babulawelwa abazali isikhumbuzo esikumila kunje nangona sibakhumbuza iintlungu abadlula kuzo kodwa sikwathetha ukuba abalityalwanga. Ukanti ukuba uya e Ngquza uza kubona uvimba wamagugu, ilitye lesikhumbuzo sabo bathi babulawa kunye namangcwaba abo baxhonyelwa e Pitoli ngonyaka ka 1962.
